اسماعيل حسانين العمدة : شاعر الجدل نزار قباني حياته ومواقفه

الأديب اسماعيل حسانين العمدة عن تداعيات 11 / 11 : مصر ليست رئيس وحكومة

كتب : اسماعيل حسانين العمدة

لما تلاقي دولة بحجم مصر حكومتها وشعبها خايفين من مظاهرات او تجمعات متشتغربش

احنا بنخاف عشان نعيش مش بنخاف عشان نضيع

الخوف على بلدك وعلى استقرارك وامنك مش ضعف

الخوف على الربطة متتفكش ولا تتفرق

الخوف على نعمة الوطن والحفاظ عليها افضل من تنفذ اللي في دماغك وتبص تلاقي شعب عظيم مشرد ولاجيء

مصر مش رئيس وحكومة وبرلمان ومؤسسات وبس

مصر شعب ومقدرات وافكار مليون ايد بتحاول تنزع منها مدخراتها وثرواتها

اعظم وضع انك تعيش قوي مش تعيش شبعان

انك تعيش في وطن مش تعيش مشرد

انك تعيش بكرامتك مش مذلول لحد

انك تصارع وتسد احتياجاتك بنفسك مش تمد ايديك

مهما أخطأت الحكومة او الرئيس وهم مش معصومين

لكن كفاية جداً انهم قدروا يحافظوا على كيان الوطن

قدروا يجمعو كلمة الوطن فوق كلمة الافراد والجماعات

قدروا يغيروا شكل البلد من عشوائيات لمدن وقرى حضارية

قدروا يخلولنا أهداف عامة ودا مش موجود في دول كتير

الرئيس عاجلا أم أجلاً هو والحكومة هيمشوا وهييجي غيرهم أكيد

ماحدش خالد فيها

لكن مش عشان انت مش عاجبك الأداء نسيبك تخربها على الكل

مش عشان انت شايف من وجهة نظرك الاخطاء ومكبرها في مخك احنا نسمح لك تنيلها

تعالى نفهم بعد الرئيس وبعد تغيير النظام هنعمل ايه

انا مع الثورة لو فعلا بتقدم حلول وبدائل وتجارب ونماذج واضحة وواقعية

انا مع الثورة لو فعلاً هتخدم وتقدم وتنمي البلد

البلد حرفياً بتحاول تنهض فادوها فرصتها تنهض وتتعافى

البلد ثباتها على الامن والاستقرار فقط اهم من اي شيء تاني انت وهو بتدوروا عليه

سيبك من السيسي وغيره مع احترامي الكامل لسيادته

لكن قلنا انت لو مكانه هتعمل ايه؟

هتقدم ايه؟ وايه خطتك؟ وايه البدائل؟ وايه المميزات اللي فيك؟

انما تعمل ثورة عشان تشيل رئيس ومعندكشي بديل ولا خطة ولا استراتيجية يبقى انت عميل لمضحوك عليك وفي الحالتين ماينفعشي اساعدك او اسمحلك بده

عايز تعمل ثورة وتبقى شاطر وبرنس وكلنا هنساعدك ونقف وراك

قدم خطة واعلن عنها وانت في بيتك وقول ياجماعة قطاع كذا محتاج كذا وقطاع كذا محتاج كذا وانا اقدر اعمل كذا وكذا وادوني فرصتي او تبنوا افكاري وان الحكومة والرئيس ماهتموش يبقى من حقك تقف قدام القضاء المصري وترفع قضية على رئيس الجمهورية والحكومة ولو القضية ترفضت يبقى اعمل ثورة والناس كلها معاك

انما حد يحركك بدون هدف ولا رؤيا ولا استراتيجية وتقولي ثورة يبقى انت فاشل وعميل وعيل سيس وملكشي لازمة وهتاخد على دماغك

انا لاول مرة هقولها اهو لو احنا كملنا زمان ومعملناش ثورة كان هيبقى احسن لما عملنا 25 يناير ضيعنا وتفرقنا ولولا ربنا رايد نتلم تاني كان زمانا متشردين وبيتنهش فينا من اللي يسوى واللي مايسواش

حتى لو البلد صفر حتى لو مفيش قوت والحال متدهور لكن فيه وطن متجمع ولو بالعافية احسن من الشتات والتشرد

خشونية السيسي دي صح في الوقت دا

عفيجية السيسي دي مظبوطة دلوقتي

حتى لو فيه اخطاء لكن فيه وطن بيتبني واظن يعني السيسي مش باني المدن دي كلها لنفسه ولا عمل الكباري اللي مش عجباك دي كلها لنفسه ولا بيهد هنا ويبني هنا لنفسه

لو انت مش مستفيد من مشروع ,غيرك حاسس بالاستفادة وشايفها ومبسوط بيها

باختصار الخطأ اللي انت شايفه ,غيرك شايفه انجاز لانه حاسس بقيمته

زي ما انت بجهلك مش حاسس بقيمة الوطن بس غيرك نفسه يلاقي ربع وطن

مش حاسس بالامن والامان وغيرك بيحسدك عليهم

انت شايف الجيش محتل البلد ومهيمن عليها لكن غيرك شايف ان عندك حماية ودفاع وقوة هو مش لاقيها والجيش اللي مش عاجبك دا باعد وشايل عنك مصايب ومخوف فئران وجرذان لو نام جيشك ثانية هتلاقيها فوق دماغك ديابة

ايوه معاك فيه تقصير وفيه تجاوزات وفيه ساعات ظلم وقهر وحاجات ماتدخلشي الدماغ ومش مفهومة وفيه جوع لفئة كبيرة لكن فيه بلدان بتعمر ومشاريع بتقوم ونهضة هنا ونهضة هناك وطرق وكباري ومشاريع وزي مافيه ناس زعلت من قرار فيه ناس نفس القرار فرحهم وهكذا وفي الاخر لمصلحة وطن مش جماعة وياريت نفهم ونتلم ونصمم ونصر نقف جنب البلد ونفهم ان البلد مش رئيس وحكومة وبس البلد حاجات كتيرة لازم تجتمع على كلمة واحدة ومصلحة واحدة

والاخطاء واحدة واحدة هتتلاشى وكل حاجة لها وقتها

ناقصنا الصبر

لو فعلا نتعلم نصبر وفي عز الصبر نحاول راح نوصل ونكمل ونول في الاخر

#رب_اجعل_هذا_بلدا_امنا

إعلان منتصف المقال